A Dirección de Caixa Galicia non calará á CIG

O Convenio Colectivo establece o dereito ao uso sindical do correo electrónico, dando Caixa Galicia dende fai mais dun ano a posibilidade deste uso.

Dende o pasado mes de xaneiro a CIG non pode facer chegar aos traballadores e traballadoras os comunicados sindicais, algo que non acontece co resto de sindicatos presentes na Caixa Galicia. Hoxe sen ir mais lonxe recibiron comunicados de CCOO e CSICA.

Para a CIG estamos ante unha censura, un recorte dun dereito recoñecido e unha vulneración da liberdade sindical. Pretenden que a nosa voz, crítica coa situación da Caixa Galicia non chegue ao persoal.

Non quedaremos calados nin cos brazos cruzados, defenderemos a liberdade sindical na rúa e nos xulgados.

Moito medo debe ter a Dirección de Caixa Galicia e moito debe ter que ocultar para impedir o dereito dos traballadores e traballadoras a recibir información sindical.